Best Opportunities for Pakistan's Youth in Digital Pakistan

Ek woh waqt tha jab jangain insani taqat, ghodon aur talwaron ke balbote par jeeti jati thein, phir tabah kun hathyaar aur atom bomb duniya par apni dhaak bithanay ke liye istemal hue, magar aaj ki duniya maeeshat aur technology ki jang larnay mein masroof hai, tamaam baray mulk isi ke zariye apnay hareefon ko shikast de rahe hain.

Best Opportunities for Pakistan's Youth in Digital Pakistan

Digital Pakistan

Ab mulkon ka sabse bara hathyar mazboot maeeshat hai, jis mulk ke paas bhi yeh "hathyar" mojood hai goya woh ghalib hai jabke maeeshat tor par kamzor mulk "an dekhi" ghulami mein jakray hue hain. Moujooda daur ki maeeshati tarjeehat mein information technology (IT) aur digitization ko nazar andaz nahi kiya ja sakta, ab duniya ka mustaqbil artificial intelligence aur networking ke sath mansoob ho chuka hai, maeeshat ab riwayati tareeqon se nahi balki digital tareeqon se phal phool rahi hai.

 

Importance of IT in Poor Economy

Pakistan ki 60% nojawan abadi hai aur yeh nojawan jab degrees le rahe hote hain to aankhon mein sunahre mustaqbil ke khwab sajate hain magar jab mulk mein berozgari ki soorat hal samne aati hai to unke sapne chakna choor ho jate hain. Aisi sangeen soorat hal mein kya iqdamat kiye jayein jo mulk ki kamzor maeeshat ko bhi faida dein aur berozgari ke maslay ko bhi hal karne mein madad dein?

 

Is baat se to hum bakhoobi waqif hain ke in masail ke hal ke liye ab riwayati tareeqon se hat kar kuch jadeed raaston ka intikhab na guzeer hai aur woh jadeed rasta IT ke shoba mein taraqqi hai. Pakistan agar chahe to IT ke shoba mein taraqqi kar ke na sirf apne qarzon se jaan chura sakta hai balki IT khidmaat farokht kar ke apni maeeshat mein bhi inquilab barpa kar sakta hai.

 

Isi tarah hamare mulk mein 6 crore se zyada smart phone users mojood hain jabke internet users ki tadaad 7.8 crore hai jo hamari abadi ka taqreeban 35% hai, jin mein ziada tar nojawan hain. Agar hum chahein to mobile aur internet ka istemal karte hue online kamai kar sakte hain aur berozgari ke maslay se chutkara hasil kar sakte hain jis tarah humsaya mulk Bharat IT ki duniya mein inquilab la chuka hai.

 

How to Earn Money Online in Pakistan on Mobile/Laptop

IT sector se mansoob tamaam shoba jaat se be tahasha mali fawaid hasil kiye ja sakte hain jabke croreon afrad rozgar hasil kar sakte hain. "IT-based skills" rakhne wali labour poori duniya mein apni khidmaat ke zariye kama rahi hai, jin mein se beshtar ghar baith kar kama rahe hain, jise "freelancing" ka naam diya jata hai. Poore duniya bshmol Pakistan mein freelancing ya online job ki madad se ghar baithay paise mandarja zeel chand tareeqon se ba asani kamaye ja sakte hain.

 

Content writing

Content writing ko is waqt online freelancing mein sab par bartari hasil hai. Acha likhne ki salahiyat rakhne wale afrad kisi fard, group ya company ki website ya unke mukhtalif projects ke liye lafazi kar sakte hain aur khoob paise kama sakte hain.

 

Academic writing

Isi tarah academic writing se bhi khoob paise kamaye ja sakte hain. Poore duniya mein graduate talaba apne assignments aur thesis waghera ke kaam ko hatmi shakal dene ke liye behtareen academic likhariyon ki madad hasil karte hain, iske badlay ache paise ada kiye jate hain.

 

Blogging

Agar aap kisi aik mozu par likhne aur bolne ke liye purjosh hain to is hawale se aap apna blog bana sakte hain. Apna blog shuru karne ke liye aapko Urdu ya English zuban par mukammal aboor hasil hona chahiye. Iske liye aapki tehqiq par mukammal command honi chahiye aur khayalat yukta hoon to behtar hai.

 

Web ki duniya mein apna blog banana ab nihayat asan ho chuka hai jahan aapko online ishtiharat milte hain. Zati blog ki tashheer aur qara'een ki tadaad barhanay ke baad Google aur deegar search engines se baqaida ishtiharat hasil kiye ja sakte hain. Blog parhnay wale qara'een ki janib se ishtiharat par clicks ke baad in ishtiharat se khaasay ache paise kamaye ja sakte hain.

 

Online marketing

Aaj ke jadeed daur mein marketing hi aisi naukri hai jisme na koi "inkaar" hai, na koi "a'tiraz" hai aur na is shobay ko koi zawal hai. Har company ki yeh khwahish hoti hai ke iski tashheer ki jaye aur zyada se zyada sponsors layin jayein, jis ke liye hamesha wo apni marketing team ko barhanay ki khwahishmand hoti hai. Tashheer ke maqsad ke liye ab companies online hi logon ko hire karti hain, jo is company ki Facebook, Instagram, Twitter, WhatsApp aur deegar platforms par marketing karte hain, jis kaam ke unhein paise diye jate hain.

 

Data entry

Data entry ka hunar seekh kar bhi online tareeqay se paise kamaye ja sakte hain. Data entry job ke liye typing aur bunyadi level ki English par aboor hona lazmi shart hai. Data entry ke kaam ke liye khaasa waqt darkar hota hai magar yeh kaam aksar aata rehta hai. Har saal ke ikhtatam, election ke douran sarkari data entry ke liye bhi online khidmaat hasil ki jati hain.

 

Market research

Market research group ka hissa ban kar bhi online tareeqay se paise kamaye ja sakte hain. Is ke liye local aur bain-ul-aqwami companies aur tehqiqi agencies se rabta karke is research group ka hissa bana ja sakta hai. Khayalat aur ideas baray companies se share karke paisa kamaya ja sakta hai. Bohot sari websites mukhtalif companies ke naye products ki jaiza report tehreer karne ke badlay bhi raqam ki ada'iyagi karti hain.

 

Facebook page aur website chalana

Mutadid restaurants ke Facebook pages aur unke Insta accounts chalane ke liye online hi logon ki talash rehti hai, jinhein mahinay ki tankhwa aur mara'aat dene ke bajaye unhein kaam ke waqt ke hisaab se paise diye jate hain. Kai students aur doosri riwayati naukri karne wale afrad is tareeqay ko apni part-time job ke tor par istemal mein late hain aur online paise kamate hain. Is par social media par aboor hasil hona zaroori hai.

 

Rukawat kya hai?

Pakistan mein aik umoomi tasur yeh paya jata hai ke online kamai mein ziada tar fraud hota hai, jis se logon ka online kamai ke sath aitmaad ka rishta qaim nahi ho pa raha. Yaqeenan aisa hota bhi hai, saada logon ko online kaam ka jhansa de kar unhein baad mein raqam faraham nahi ki jati. Fraud karne wale Facebook aur deegar platforms ke zariye logon ko bewaqoof banate hain aur unse fraud karte hain.

 

Aksar waqiat mein to log online kaam muhaiya karne ki fees tak mang lete hain aur baad mein kaam diye baghair nau do gyarah ho jate hain. Aise waqiat bhi samne aate hain ke jab online kaam kuch aur dikhaya jata hai aur fees lene ke baad koi aur kaam de diya jata hai.